Маңғыстау облысында Каспий теңізі жағалауында өткен әскери-теңіз күштерінің оқу-жаттығуы кезінде қаза тапқан әскери қызметшілер саны 12-ге жетті. Бұл туралы аймақ әкімдігі мәлімдеді.

Әкімдіктің Telegram-арнасында нақтыланған мәлімет жарияланды.

– Нақтыланған мәліметке сәйкес, оқу-жаттығу-жауынгерлік тапсырманы орындау кезінде ауа райының күрт нашарлап, желдің күшеюіне байланысты 17 адам суға кеткен. Оның 12-сі қаза тауып, үш әскери қызметші құтқарылды. Қалған екі әскери қызметшіні іздестіру жұмыстары жалғасып жатыр.

Төтенше оқиға болған жерде Премьер-министрдің орынбасары Қанат Бозымбаев бастаған Үкіметтік комиссия жұмысын жалғастырып жатыр.

Қазіргі уақытта жұмылдырылған мемлекеттік органдардың іс-қимылы мен іздестіру-құтқару жұмыстары үйлестірілуде.

Негізгі міндет – орналасқан жері анықталмаған екі әскери қызметшіні табу.

Қанат Бозымбаев әлі табылмаған әскери қызметшілерді іздестіруді қажетті барлық күштер мен құралдарды тарта отырып, тәулік бойы үздіксіз жүргізуді тапсырды.

Сондай-ақ қаза тапқан әскери қызметшілердің отбасыларына қажетті материалдық және өзге де көмек көрсету тапсырылды.