Ішкі істер министрлігінің алкоголь сатылымына шектеу қою бастамасы талқыланған кезде елде спирттік ішімдікке мүлдем тыйым салу туралы ұсыныс айтылды. Бұл идеяның авторы – сенатор әрі бұрынғы ІІМ орынбасары Марат Қожаев деп мәлімдеді Kursiv.kz басылымы.

Сенатордың айтуына қарағанда, алкогольдің еркін сатылуы Қазақстанға экономика және әлеумет тұрғысында зиян келтіріп отыр. Жол-көлік апаттары, еңбек қабілетінің жоғалуы және емделуге кететін шығындарға алкогольді сусындар бірден-бір себеп.

Қожаевтың сөзінше, еліміздегі 500-ден астам елді мекенде алкогольден толықтай бас тартқан, соның нәтижесінде құқықбұзушылықтар азайған.

Сенат отырысындағы үзілісте Қожаев бұл шаралар тыйым салу емес, тәртіп орнатуға бағытталғанын атады: «Білесіз бе, мен бұл ұсынысты дұрыс деп есептеймін. Алкоголь – өмір сүру үшін маңызды өнім емес. Ал елдегі құқықбұзушылықтардың 30 пайызы алкогольдің кесірінен болады», – деді сенатор Марат Қожаев.

Материалды дайындаған: Мөлдір Түктібай