Астанада туристер саны артып, елорданың туристік әлеуеті нығайып келеді. 2026 жылдың алғашқы үш айында қалаға 352 мың турист келген. Бұл өткен жылдың сәйкес кезеңімен салыстырғанда 12%-ға көп.

Келген туристердің 68 мыңы – шетелдік қонақтар. Қалаға турист тартуда ірі халықаралық және іскерлік іс-шаралар да маңызды факторға айналып отыр.

2026 жылдың I тоқсанының қорытындысы бойынша қонақ үйлер көрсеткен қызметтер көлемі өткен жылдың ұқсас кезеңімен салыстырғанда 21%-ға артқан.

Қала қонақтарының ыңғайлылығы үшін елордада 129 жаяу жүргіншілер көрсеткіші және Visit Astana ресми туристік порталына бағыттайтын QR-кодтары бар 93 ақпараттық пилон орнатылды. Бұл портал арқылы туристер Астана, оның көрікті жерлері мен туристік нысандары туралы қажетті ақпарат ала алады.

Сондай-ақ қалада 2 туристік-ақпараттық дүңгіршек және 5 Taxi Point терминалы жұмыс істейді.

Қаламен өз бетінше танысқысы келетін туристер үшін 8 тілдегі аудиогидтермен жабдықталған Red Bus экскурсиялық автобусы қатынайды. Қазір елордада туристер бара алатын 100-ден астам нысан бар. Бұдан бөлек, қала қонақтарына экскурсия өткізетін 140-тан астам кәсіби гид жұмыс істейді.

Астанада қолжетімді туризмді дамытуға да ерекше назар аударылып отыр. Қалада 5 инклюзивті туристік маршрут әзірленді. Өткен жылы елорда ТМД елдері арасында Еуропалық қолжетімді туризм желісінің алғашқы мүшесі атанды.

Жыл сайын іскерлік және оқиғалық іс-шаралар саны да артып келеді. 2026 жылдың 7 айының қорытындысы бойынша өткізілген іс-шаралар саны өткен жылдың сәйкес кезеңімен салыстырғанда өскен. 2025 жылдың 7 айында 858 іс-шара өткізілсе, 2026 жылдың 7 айында бұл көрсеткіш 957-ге жетті.

Биыл елордада бірқатар ірі халықаралық іс-шара өтті. PGL Astana 2026 турниріне шамамен 25 мың адам қатысып, оның онлайн-аудиториясы 50 миллион көрерменнен асты.

Comic Con Astana 2026 іс-шарасына шамамен 76 мың адам келді. Оның ішінде 12 мыңға жуығы – туристер.

Сонымен қатар іскерлік және оқиғалық туризм бағыты да белсенді дамып келеді. Automechanika Astana көрмесіне 15 мыңнан астам адам қатысып, оған 45-тен астам елдің өкілдері келді. Ал Eurasian Book Fair халықаралық кітап көрмесіне 15 елдің өкілдері қатысты.