Жаңа ғылыми зерттеу шамамен 7 миллион жыл бұрын өмір сүрген чад сахелантропының (Sahelanthropus tchadensis) тік жүре алғанын дәлелдеді. Бұл оны тік жүріс қабілеті болған адамзаттың ең көне белгілі арғы аталарының біріне айналдырады. Зерттеу нәтижелері Science Advances ғылыми журналында жарияланды.

Зерттеуді Нью-Йорк университеті, Вашингтон университеті, Чаффи колледжі және Чикаго университетінің ғалымдары бірлесіп жүргізген. Олар үш өлшемді модельдеу және заманауи морфологиялық талдау әдістері арқылы сахелантроп сүйектерінен тік жүріске тән маңызды белгілерді анықтаған.

Атап айтқанда, зерттеушілер сан сүйегіндегі ерекше төмпешікті тапқан. Бұл – адамның денесін тік ұстауға жауап беретін, ең қуатты байлам саналатын илеофеморальды байламның бекитін орны. Мұндай құрылым бұған дейін тек адам эволюциялық тармағына жататын гомининдерде ғана байқалған.

Сонымен қатар сахелантропта:

  • сан сүйегінің табиғи бұрылымы (феморальды антеторсия),

  • жамбасты тұрақтандыратын дамыған бөксе бұлшықеттері,

  • аяқ пен қол ұзындығының гомининдерге жақын арақатынасы

сияқты белгілер анықталған. Оның аяқтары қазіргі адамға қарағанда қысқалау болғанымен, маймылдарға қарағанда ұзындау, бұл тік жүруге өтудің аралық сатысын көрсетеді.

Сахелантроп чадский алғаш рет 2000-жылдардың басында Чадтағы Джураб шөлінен табылған. Алғашқы зерттеулер негізінен бас сүйекке сүйеніп, қозғалыс ерекшеліктері жөнінде нақты қорытынды жасауға мүмкіндік бермеген еді. Кейін табылған сан және білек сүйектерінің жаңа талдауы бұл түрдің адам эволюциясындағы орнына қатысты пікірталастарды қайта жандандырды.

Ғалымдардың айтуынша, жаңа деректер сахелантроптың адамзат эволюциясындағы маңызды буын екенін айқын көрсетті.