ІІМ Әкімшілік полиция комитеті төрағасының орынбасары Алексей Милюк Көлсай көліне түскен Павел Дуровқа қандай шара қолданылуы мүмкін екенін айтты.

Алексей Милюктің хабарлауына қарағанда, Дуров — ерекше қорғалатын табиғи аумақ ережесін бұзған. Су айдынына шомылғаны үшін жауапкершілікке тарту жағын Экология министрлігі қарастырады:

— Біз рәсімдеген жоқпыз. Тек бұқаралық ақпарат құралдарында шыққан материалдарды жинап шықтық. Барлық деректі Экология министрлігіне табыстадық, — деді комитет төрағасының орынбасары.

Осы орайда БАҚ өкілдері одан Павел Дуровқа қанша мөлшерде айыппұл салынуы мүмкін екенін сұрады.

— Қалай жіктелетіндігіне байланысты. Әр түрлі болуы мүмкін. Өкілетті органдармен сөйлесу қажет. Ең төменгі шара — ескерту. Сондай-ақ қателеспесем, 10 АЕК мөлшерінде айыппұл салынады, — деді ол.

Айта кетейік, Тelegram мессенджерінің негізін қалаушы Павел Дуров Алматы облысындағы Көлсай суына шомылып жатқан бейнежазбасын жариялаған еді.