Қазақстанда 2027 жылы Астанада жаңа әуежайдың құрылысын бастау жоспарланып отыр. Жобаны жүзеге асыруға осы саладағы әлемдік ірі компаниялардың бірі тартылады. Бұл туралы Президент Қасым-Жомарт Тоқаев Қазақстан халқына Жолдауында мәлімдеді.

Мемлекет басшысы елімізде әуе көлігі инфрақұрылымын дамыту бағытында ауқымды жұмыстар жүргізіліп жатқанын атап өтті. Оның айтуынша, қазіргі уақытта Қазақстанның бірнеше өңірінде әуежай құрылысы қатар жүзеге асырылып жатыр.

– Қазір Қазақстанда бірнеше әуежайдың құрылысы қатар жүргізіліп жатыр. Мұндай нысандарды бір мезетте салу тәжірибесі ел тарихында бұрын-соңды болмаған, – деді Қасым-Жомарт Тоқаев.

Президент Арқалық қаласындағы әуежайды қалпына келтіру жұмыстары аяқталғанын хабарлады. Сонымен қатар Зайсан, Катонқарағай және Кендірлі әуежайларын таяу уақытта пайдалануға беру жоспарланып отыр.

Мемлекет басшысы елордадағы жаңа әуежай құрылысына да тоқталды.

– Келесі жылы осы саладағы әлемдік ірі компаниялардың бірін тарта отырып, Астанада жаңа әуежайдың құрылысын бастаймыз, – деді Президент.

Қасым-Жомарт Тоқаев Қазақстанның Еуразиядағы негізгі көлік хабтарының бірі ретіндегі орнын нығайту үшін әлі де көптеген маңызды міндетті орындау қажет екенін атап өтті.

Президенттің айтуынша, бұл бағыттағы басым міндеттердің бірі – көлік саласын, оның ішінде халықаралық тасымалдарды толық цифрландыру.

Мемлекет басшысы заманауи технологиялар қарқынды дамып жатқан кезеңде жаһандық транзиттік жүк ағындарын дәстүрлі қағаз құжаттар арқылы басқару тиімсіз екенін айтты.

– Ең алдымен, халықаралық бағыттарды қоса алғанда, көлік саласын толық цифрландыру қажет. Жасанды интеллект дәуірінде жаһандық транзит ағындарын қағаз жүкқұжаттары арқылы басқару – ақылға қонымсыз. Ал бұл – тығырыққа апаратын ең қысқа жол, – деді Қасым-Жомарт Тоқаев.

Осылайша, Президент әуежайлар желісін кеңейтумен қатар, көлік саласындағы басқару және құжат айналымы жүйелерін жаңғыртудың маңызын атап өтті.

Мемлекет басшысының айтуынша, инфрақұрылымды дамыту мен цифрлық шешімдерді енгізу Қазақстанның Еуразиядағы көлік хабы ретіндегі ұстанымын нығайтуға бағытталуы тиіс.