Каспий теңізінің қазақстандық жағалауындағы төрт учаскеде режимдік шектеулер уақытша алып тасталады. Тиісті бұйрыққа Ұлттық қауіпсіздік комитетінің төрағасы қол қойды.

Каспийдің қазақстандық жағалауындағы төрт учаскеде режимдік шектеулер алынады:

  • Түпқараған мүйісінен Үрдік мүйісіне дейін;
  • Саура елді мекенінен Сағындық мүйісіне дейін;
  • Жартасты мүйісінен Құмды мүйісіне дейін;
  • Құмды мүйісінен Адамтас мүйісіне дейін.

Бұл учаскелерде демалыс, туризм және спорт мақсатында қазақстандық шағын көлемді кемелермен теңізге шығуға рұқсат етіледі.

Мұнда катерлер, қайықтар және гидроциклдерді қоса алғандағы өзге де шағын кемелер туралы сөз болып отыр. Жағалаудан екі теңіз милінен – шамамен 3,7 шақырымнан аспайтын қашықтыққа ұзауға болады.

Режимнің алынуы демалушылар үшін бүкіл жағалау немесе Каспийдің барлық акваториясы қолжетімді болады дегенді білдірмейді.

Бұрынғыдай, теңіздегі экономикалық қызмет аймақтарында шектеулер сақталады. Олардың қатарында:

  • теңіз порттары;
  • су тартқыш арналар;
  • газ терминалдары;
  • кеме жүретін фарватерлер;
  • теңіз дәліздері бар.

Бұл аймақтарға шағын көлемді кемелермен кіруге бұрынғыша тыйым салынады.