Қазақстанның жаңа Alatau City қаласы Орталық Азиядағы халықаралық бизнес пен инвестицияларды тартатын орталықтардың біріне айналуы мүмкін. Алайда жобаның табысты жүзеге асуы заманауи инфрақұрылым қалыптастыруға, тұрақты құқықтық орта құруға және стратегиялық жоспарларды нақты іске асыруға байланысты. Мұндай пікірді халықаралық сарапшылар Alatau City жобасының Еуропадағы инвестициялық роуд-шоуы барысында білдірді.

Лондон, Берлин және Майндағы Франкфурт қалаларында өткен іскерлік кездесулерде британдық сәулетші әрі урбанист Гарри Доббс пен халықаралық Schneider Group консалтинг компаниясының негізін қалаушы Ульф Шнайдер жаңа қаланың даму перспективаларына қатысты көзқарастарын ортаға салды.

Алатау қалалық кеңесінің тәуелсіз мүшесі Гарри Доббстың пікірінше, Alatau City жобасының басты ерекшелігі – Қазақстанның экономика, қаржы және құқықтық реттеу салаларында жинақтаған тәжірибесін біртұтас қала құрылысы жобасында біріктіру.

Әңгіме Қазақстанның экономика, қаржы және заңнамалық инновациялар саласында жинақтаған тәжірибесі туралы болып отыр. Енді бұл тәжірибе ауқымды қала құрылысы жобасы арқылы іс жүзінде жүзеге асырылмақ, – деді Гарри Доббс.

Сарапшының бағалауынша, Alatau City Қазақстан мен Орталық Азия нарығына шығуға ниетті халықаралық компаниялар үшін маңызды іскерлік алаңға айналуы мүмкін.

Бұл бағытта қала аумағында қарастырылған арнайы құқықтық режимге ерекше мән беріліп отыр.

Оның негіздері конституциялық заңда айқындалған. Құқықтық режим қала аумағында кәсіпкерлік қызметті реттеудің ерекше шарттарын, оның ішінде Англия мен Уэльс құқығының қағидаттарын қолдану мүмкіндігін қарастырады.

Мұндай тәсіл инвесторлар үшін болжамды құқықтық орта қалыптастыруға, олардың мүдделерін қорғауға және бизнес жүргізуге қолайлы жағдай жасауға бағытталған.

Гарри Доббс қазіргі уақытта Alatau City жобасы стратегиялық тұжырымдамадан нақты құрылыс пен инфрақұрылымдық шешімдерді жүзеге асыру кезеңіне өтіп жатқанын атап өтті.

Қалада орталық іскерлік ауданды (CBD) қалыптастыру, кәсіпкерлік, туризм және логистика салаларындағы ірі жобаларды дамыту жоспарланып отыр. Сонымен қатар қаланың бас жоспарын әзірлеу жұмыстары жүргізілуде.

Болашақ қаланың тұжырымдамасы мен даму бағыты айқындалды. Ендігі міндет – осы идеяларды нақты қалалық ортаға айналдырып, толыққанды физикалық инфрақұрылым қалыптастыру, – деді сәулетші.

Оның айтуынша, жобаны жүзеге асыру үшін қала жоспарлау, инфрақұрылымды дамыту және құқықтық реттеу салаларындағы халықаралық мамандардың тәжірибесін пайдалану маңызды.

Осындай пікірді Schneider Group компаниясының президенті әрі негізін қалаушы Ульф Шнайдер де білдірді.

Ол Alatau City дамуының келесі кезеңіндегі негізгі міндет стратегиялық жоспарларды нақты жобаларға айналдыру және олардың жүйелі түрде орындалуын қамтамасыз ету екенін атап өтті.

Инвестиционный круглый стол Alatau City в Лондоне

Сарапшы Қазақстанның жаңа қалалар салу тәжірибесіне тоқталып, Астананың құрылысын ауқымды урбанистикалық бастамаларды жүзеге асырудың мысалы ретінде келтірді.

Оның пікірінше, Қазақстанның қаржылық және адами ресурстары, сондай-ақ халықаралық экономикалық байланыстары Alatau City жобасын дамытуға қосымша мүмкіндіктер береді.

Ульф Шнайдер жаңа қаланың Алматыға жақын орналасуын да маңызды артықшылықтардың бірі ретінде бағалады.

Сарапшының айтуынша, Alatau City-дің дамуы Азия мен Еуропа нарықтарын байланыстыратын Орта дәліздің экономикалық рөлін кеңейтуге ықпал етуі мүмкін.

Қазіргі уақытта Орта дәліз негізінен транзиттік қызмет атқарады. Алайда Alatau City оның тек транзиттік бағыттан инвестициялық дәлізге айналуына ықпал ете алады, – деді Ульф Шнайдер.

Бұл мүмкіндік халықаралық компанияларды тартуға, қала аумағында жаңа кәсіпорындар құруға және іскерлік белсенділікті арттыруға байланысты болмақ.

Сонымен қатар сарапшы инвестициялық тартымдылықты тек салықтық жеңілдіктер арқылы қамтамасыз ету жеткіліксіз екенін айтты.

Оның пікірінше, шетелдік инвесторлар ұзақмерзімді шешім қабылдағанда дамыған инфрақұрылымды, сенімді құқықтық реттеуді және қолайлы іскерлік ортаны қатар ескереді.

Осыған байланысты Alatau City жобасының келешегі қаланың экономикалық базасын қалыптастыруға, инвестицияларды нақты жобаларға бағыттауға және тиімді басқару жүйесін құруға тәуелді болады.

Халықаралық сарапшылардың бағалауынша, Alatau City-дің аймақтық іскерлік орталыққа айналу мүмкіндігі бар. Дегенмен бұл әлеуетті жүзеге асыру үшін бастапқы тұжырымдаманы нақты инфрақұрылымдық, технологиялық және инвестициялық жобалармен қамтамасыз ету қажет.

Лондон, Берлин және Франкфурт қалаларында өткен инвестициялық кездесулер жаңа қаланың халықаралық деңгейдегі мүмкіндіктерін таныстыруға және шетелдік серіктестермен ұзақмерзімді ынтымақтастық орнатуға бағытталды.

Автор: Изғали Еркеназ