Тоқаев пен Бельгия корольдік жұбы Alem.ai орталығының жұмысымен танысты

Президент Қасым-Жомарт Тоқаев, Бельгиялықтар Королі Филипп пен Патшайым Матильда Alem.ai халықаралық жасанды интеллект орталығын аралады.

Құрметті қонақтарға музей экспозициясы, роботты техника аймағы және ЖИ-кинотеатр мүмкіндіктері таныстырылды.

Сондай-ақ оларға Alem.ai орталығын дамытудың ұзақмерзімді стратегиясы туралы мәлімет берілді.

Фото: akorda.kz

Кездесу барысында TUMO Astana білім беру бағдарламасы да таныстырылды.

Бұдан бөлек, Қазақстан-Бельгия бірлескен жасанды интеллект және математика зертханасының жұмысы туралы ақпарат ұсынылды.

Зертханада NeuroLearn және ParkScreen сияқты бастамалар қолға алынған.

Фото: akorda.kz

NeuroLearn жобасы жасанды интеллект, нейроғылым және бейімдеп оқыту салаларындағы зерттеулерге бағытталған.

Ал ParkScreen бастамасы Паркинсон ауруын алдын ала анықтайтын жасанды интеллект негізіндегі скрининг әдістерін дамытуға арналған.

Іс-шара барысында Гент университетінің атынан Қазақстанның талантты оқушылары мен студенттеріне телескоп табысталды.

Телескопта Нобель сыйлығының физика саласы бойынша лауреаттары Франсуа Энглердің, Герард ’т Хоофттың және Мишель Майордың қолтаңбасы бар.

Фото: akorda.kz

Сондай-ақ онда бельгиялық астронавт Франк Де Винненің қолтаңбасы қойылған.

Alem.ai орталығына жасалған сапар Қазақстан мен Бельгия арасындағы жасанды интеллект, математика, білім және ғылыми зерттеулер саласындағы ынтымақтастықты дамытуға бағытталған.