Белгілі ақын Серікзат Дүйсенғазының бастамасымен жас өнертапқыштарды қолдауға, техникалық танымын кеңейтіп, серпін беруге батытталған Әлихан Мақсұт атындағы халықаралық фестиваль өтіп жатыр. 

Жас өнертапқыштарды қолдауға бағытталған дәстүрлі іс-шара ақынның марқұм ұлына арналып отыр. Әлихан Мақсұт та өзінің санаулы ғұмырында тың технология мен робототехникаға қуат беріп, құрылғы есебінде құрауға ерекше қызығушылық танытқан.

Халықаралық дода хақында Л.Н.Гумилев атындағы ЕҰУ филология факультетінің деканы, ақын Серікзат Дүйсенғазы:

— Былтыр көшпенділер ойыны болды, соған байланысты біздің барлық категорияларымыз ұлттық спортқа арналды. Аударыспақ, асық ату, арқан тартыс  деген сияқты. Балалар арасында насихаттау үшін. Ал биыл тағы жаңалықтар енгізілді. Соның біреуі дрондардың сайысы, дрондар футболы. Әлемде қазір дрон деген өте өзекті, — деп пікір білдірді. 

Халықаралық фестивальге республикамыздың әр өңірінен және Қырғызстан, Өзбекстан елдерінен келген жасөспірімдер қатысқан. Өндір өнертапқыштар  6 бағыт бойынша құрастырған құрылғыларын сынаққа салып, шабысы мен қарымын байқап көрді.

Жарысқа қатысушылардың бірі сызық бойымен жүретін робот ұсынған. Өнертабыс иесі Мансұр Нұржановтың хабарлауына қарағанда, топ ерекше құрылғыны 5 күн дайындап шыққан.

Орайы келгенде айта кетейік, Әлихан Мақсұт атындағы «RoboZerde-2025» I халықаралық робототехника фестивалі Л.Н. Гумилев атындағы Еуразия ұлттық университетінің Бас ғимаратында өтіп жатыр. Фестивальге қатысқан екі жүзден аса мектеп оқушысы төмендегі 6 санат бойынша бақ сынасқан:
1. Micro –FPV 12-18 жас ;
2. Дрон футболы 12-18 жас ;
3. Басқару симуляторы 10-18 жас;
4. Мерген 14-18 жас;
5. «Инверсті сызық бойымен жарыс» 9-13 жас;
6. Шығармашылық санат «My Extra Case Competition» 13-18 жас.
RoboZerde-2025 – бұл жас өнертапқыштар мен болашақ инженерлерге арналған халықаралық деңгейдегі инновациялық алаң. Фестиваль оқушылардың робототехника, инженерия, жасанды интеллект және STEM-технологиялар саласындағы жетістіктерін көрсетуге мүмкіндік береді.
Іс-шараны «Дарын» республикалық ғылыми-практикалық орталығы, «Әлихан Мақсұт атындағы дарынды балаларды қолдау қоры», Астана қаласы Білім басқармасы, «Астана дарыны» дарынды балалар мен талантты жастарды анықтау және қолдау орталығы, №9 «Зерде» мамандандырылған лицей, Л.Н. Гумилев атындағы ЕҰУ, Astana IT University, Астана қаласының «Роботек» білім беру робототехника мектебі, «KAZ ROCKETS» қоғамдық коры, «My Extra Lab» ЖШС бірлесіп ұйымдастырып отыр.