Дінмұхаммед Қонаевтың қарындасы Рауза Қонаева дүниеден өтті.

Қаралы хабарды Мәжіліс депутаты Бақытжан Базарбек жеткізді. Ол марқұмның адамгершілік болмысы мен ұстаздық қасиетін ерекше ілтипатпен еске алды.

— Ол әрдайым адамға тура қарап сөйлейтін. Айтар сөзін екшеп, қарсы алдындағы жанға шын мәнінде қажет ойды жеткізе білетін. Үнемі жымиып жүретін, ішкі уайымы мен толғанысын сыртқа білдірмейтін, — деп жазды депутат.

Рауза Қонаева 1934 жылы Алматы облысы Шілік ауылында дүниеге келген. 1952 жылы М.В. Ломоносов атындағы Мәскеу мемлекеттік университетінің биология-топырақтану факультетіне оқуға түсіп, 1956 жылы оқуын үздік тәмамдады.

Осы жылдан бастап 2016 жылға дейін Қазақстан Республикасының Ғылым академиясында еңбек етіп, отандық ғылымның дамуына елеулі үлес қосты.