АҚШ соты Алматы қаласы мен «БТА Банкке» қатысты іс бойынша Алматының бұрынғы әкімі Виктор Храпуновтың ұлы Ильяс Храпуновты кінәлі деп таныды, деп хабарлады Қазақстан Әділет министрлігінің баспасөз қызметі.

«6 тамызда Нью-Йорк штатының Оңтүстік Округтік соты дәлелдерге сүйене отырып тыңдау процесін өткізгеннен кейін, жауапты орган – Алматы қаласы мен «БТА Банк» АҚ-тың пайдасына шешім шығарды. Сот Ильяс Храпуновтың құзырлы орган өкіліне құрметсіздік танытқанын айтты. Бұған дейін қабылданған $221 285,31 төлеу туралы шешімге қосымша ретінде, Федералдық судья Джон Г. Келтл Храпуновқа қабылдаған жазаға сай өзінің активтері туралы тұрақты түрде есеп бермеген», – делінген хабарламада.

«Жаңа шешімге сәйкес, Ильяс Храпунов өзінің активтері мен өзіне қарсы шығарылған сот үкімін орындау аясында қаржылық жағдайы жайлы есеп беріп, өзін толық бақылауға алуға қарсылық танытпауы қажет. Аталмыш талап орындалмаған жағдайда оған қосым санкциялар салынады. Сонымен қатар, ол Алматы қаласы мен «БТА Банкке» сотты құрметтемегені үшін айыппұл өтеуге тиіс», – деп қосты министрлік.

Ильяс Храпунов – 2007 жылы ақша жымқырғаны үшін қызметінен алынған Алматының бұрынғы әкімі Виктор Храпуновтың ұлы. Ильяс Храпунов отбасы­сымен бірге 2008 жылы Швейцарияға қоныс аударған. Қазақстанда Храпуновтарға ұрлық пен жемқорлыққа қатысты, ұрланған активтерді заңдастыру бойынша айып тағылған. «БТА Банк» пен Алматы әкімдігі АҚШ пен Ұлыбритания сотында Ильяс және Виктор Храпуновтарға қарсы іс қозғап, қалаға $300 млн астам залал келтірілгенін және олардың Мұхтар Әблязовқа ұрланған қаржыны заңдастыруға көмектескенін дәлелдеп жатыр. АҚШ-та Ильяс Храпунов кінәлі деп танылып, сот шешімдерін бұзғаны мен жалған куәлік бергені үшін санкцияға ілінді.

Материалды дайындаған: Мөлдір Түктібай