Оңтүстік Корея жасанды интеллект (ЖИ) модельдерін қауіпсіз пайдалану тәртібін реттейтін кешенді заңды ресми түрде қабылдады. Осылайша ел бұл бағытта әлемде алғаш болып, дезинформация мен жасанды интеллектке байланысты өзге де қауіп-қатерлердің алдын алуға арналған құқықтық негіз қалыптастырды.

Оңтүстік Кореяның Ғылым министрлігінің мәліметіне сәйкес, бейсенбі күні «Жасанды интеллектіні дамыту және оның сенімділігін қамтамасыз ету негіздерін қалыптастыру туралы негізгі заң» ресми түрде күшіне енді. Бұл құжат «ЖИ туралы негізгі заң» деп те аталады.

Аталған заң үкіметтің жасанды интеллектіні қолдану тәртібіне қатысты жан-жақты әрі жүйелі ережелерді алғаш рет қабылдауы ретінде бағаланып отыр.

Құжатқа сәйкес, компаниялар мен ЖИ әзірлеушілеріне жасанды интеллект арқылы жасалуы мүмкін жалған контент пен дезинформацияға қарсы күресуде жоғары жауапкершілік жүктеледі. Сонымен қатар, үкіметке заң бұзушылықтарды тергеу және айыппұл салу өкілеттігі берілген.

Заңда «жоғары тәуекелді жасанды интеллект» ұғымы енгізілген. Бұл санатқа пайдаланушылардың күнделікті өміріне немесе қауіпсіздігіне елеулі әсер етуі мүмкін контентті генерациялайтын ЖИ модельдері жатады. Олардың қатарына жұмысқа қабылдау, несие беру және медициналық кеңес беру салаларында қолданылатын жүйелер кіреді.

Заң талаптарын бұзған жағдайда 30 миллион вонға дейін (шамамен 20 400 АҚШ доллары) айыппұл салынуы мүмкін. Сонымен бірге, жеке сектордың жаңа талаптарға бейімделуі үшін айыппұлдарды қолдануға бір жылдық өтпелі кезең қарастырылған.

Бұдан бөлек, заңда жасанды интеллект индустриясын дамытуға бағытталған шаралар да қамтылған. Атап айтқанда, Ғылым министрі әр үш жыл сайын ЖИ саласын дамытуға арналған іс-қимыл жоспарын ұсынуға міндетті.