Жаңаөзен қаласында «Біліміміз — елімізге» деген еріктілер ұйымдастырған жобасы жүзеге асты. Жоба аясында «Болашақ» түлектері халыққа тегін медицина қызметін ұсынып, кәсіп жүргізуге қатысты кеңес берді.

18-19 шілде күндері Маңғыстау облысының Жаңаөзен қаласында “Біліміміз — елімізге” атты волонтерлік жоба өтті. Бастама барысында халықаралық деңгейдегі мамандар тегін медициналық және кәсіпке қатысты кеңес берді. Бұл жоба “Болашақ” халықаралық стипендиясы түлектері Қауымдастығының Алматы бөлімшесінің ұйымдастыруымен өтті.

Іс-шараның әлеуметтік мән-маңызы:

Жаңаөзен сияқты шалғайда орналасқан қала тұрғындары сапалы медициналық қызметке жете бермейді. Осы жоба аясында әлемнің үздік университеттерінде білім алған жоғары білікті мамандардың халыққа тегін қызмет көрсетті. Мұндай бастаманың өзі халыққа мол мүмкіндік берді. Тегін консультациялар мен кеңестер халықтың денсаулығын жақсартуға, ауруларды ерте анықтауға және алдын алуға, сондай-ақ сапалы медициналық көмек алуға жол ашты.

Жобаның халыққа тигізген пайдасы:

Екі күн ішінде 170-тен астам тұрғын медициналық көмек алды. Әрбір маман өз бағыты бойынша кеңейтілген кеңес беріп, көп науқастың диагнозын дәл анықтауға және емдеу жоспарын құруға көмектесті. Мамандардың кеңесі арқасында көптеген адам сапалы медициналық көмекке қол жеткізді.

Кәсіпкерлік бағыттағы кеңестер де маңызды болды. Жергілікті кәсіпкерлер мен жастар өз бизнесін дамытуға, жаңа идеялар табуға және табысты болуға қажетті білім мен мотивация алды.

Сонымен қатар бұл жоба тек қана медициналық немесе кәсіпкерлік көмек көрсету ісімен шектелмейді. Бастама өңірдің дамуына, білім беру ісін ілгерлетуге және әлеуметтік жауапкершілікті арттыруға бағытталған. “Болашақ” түлектері ұдайы түрде өз білімдерін, тәжірибелерін бөлісіп, өскелең ұрпаққа үлгі болып келеді. Жас талапкерлер мен тұрғындарды да сапалы білім алуға және елге қызмет етуге шақырады.

Орайы келгенде айта кетелік, жобаның демеушісі – Маңғыстау өңіріндегі “Болашақ” Қауымдастығының ресми өкілі Мұрат Акинов. Іс-шараға аритмолог, онколог-гинеколог, инфекционист, эпидемиолог, эндокринолог, кардиохирург, кардиолог, оториноларинголог, мамолог, психолог, нефролог, аллерголог сияқты әлемнің үздік университеттерінде білім алған 12 жоғары санатты медицина маманы қатысты. Атап айтқанда:

  1. Ракишев Бауыржан— жоғары дәрежелі кардиохирург, А.Сызғанов атындағы ұлттық ғылыми хирургия орталығының кардиохирургия бөлімшесінің меңгерушісі;

  2. Байдаулетова Жұлдыз — ҚазҰУ-нің ішкі медицина кафедрасының аға оқытушысы, нефролог дәрігер;

  3. Сарсенбаева Гүлжан — медицина ғылымдарының докторы, кардиолог, балалар кардиохирургі;

  4. Махамбет Ақмарал — маммолог;

  5. Тулепбергенов Ғани — PhD докторы, жоғары дәрежелі аритмолог дәрігер;

  6. Тәжібаева Қарлығаш — профессор, онколог-гинеколог;

  7. Касенова Гаухар — жоғары дәрежелі эндокринолог дәрігер;

  8. Садыкова Әсел — PhD докторы, эпидемиолог, инфекционист дәрігер;

  9. Елшібаева Күлмаш — профессор, практик психолог;

  10. Шарипова Алия — балалар психологы;

  11. Большанова Мая — жоғары дәрежелі оториноларинголог дәрігер;

  12. Батырбаева Арай — аллерголог дәрігер.

Акцияның алғашқы күні, 18 шілдеде, Жаңаөзен қаласы әкімінің міндетін атқарушы Жаңабай Үсембайұлы Аймағамбетов “Болашақ” Қауымдастығынан келген мамандарды қабылдады. Кездесуден кейін мамандар қаланың бірнеше медициналық мекемелерінде адам емдеді, білігі мен білімін бөлісті.

Екінші күні, 19 шілдеде, барлық аталған мамандар №1 Жаңаөзен қалалық емханасында қабылдауды жалғастырды.

Сонымен қатар, “Болашақ” бағдарламасымен білім алған тәжірибелі кәсіпкерлер де жергілікті кәсіп бастаушыларға, оның ішінде 30 жасөспірім мен жастарға кәсіпкерлік және мансапқа жету бағытында кеңес берді. Іс-шара аясында кәсіпкерлер Мұрат Акиновтың жұмыс орнына барып, елімізде бұрын-соңды болмаған мұнай өндіру құралдарын шығаратын зауыттың өндірісімен танысты.

Бір айта кетерлігі, екі күн ішінде дәрігерлер жалпы саны 170-тен астам пациентті қабылдап, оларға қажетті медициналық көмек пен кеңес берді.

Мамандардың қызметі бойынша қорытынды:

  • Кардиолог: 35 пациент қаралды, оның ішінде 3 науқасқа Алматы қаласында ота жасау ұсынылды. Барлық қаралғандарға ЭКГ және жүрек УДЗ тексерулері жүргізілді. Жүрек ырғағының бұзылуы, жүректің ишемиялық ауруы, артериалды гипертензия және жүрек ақаулары анықталды.
  • ЛОР-дәрігер: 45 пациент (көбінесе балалар) қабылданып, тиісті ем тағайындалды. 20 пациентке ота жасау ұсынылды. ЛОР-органдарды тазалау бойынша манипуляциялар жүргізіліп, балалар мен ата-аналарға мұрынмен дұрыс тыныс алу, шырышты тазарту және дәрі-дәрмектерді қолдану ережелері түсіндірілді.
  • Маммолог: 25 әйел қаралды. Бір пациентте қатерлі ісік расталып, үш науқас отаға жіберілді, қалған үшеуіне динамикалық бақылау тағайындалды. Барлық пациенттерге сүт бездерін пальпациялау жүргізіліп, скрининг туралы ақпарат берілді.
  • Эндокринолог: 34 пациент (2 бала, 1 жасөспірім) қаралды. Қалқанша безінің қызметінің төмендеуі, 2 жағдайда 2-типті қант диабеті, 2 жағдайда предиабет және 2 жағдайда диффузды токсикалық зоб (ДТЗ) анықталды. Ағымдағы терапия түзетіліп, қосымша тексерулер тағайындалды.
  • Балалар кардиохирургы: 39 бала қаралды, барлығына ЭХО КГ жасалды. Туа біткен жүрек ақаулары бар жаңа туған нәрестелер мен операция алды-кейінгі балаларға медикаментозды терапия бойынша ұсыныстар берілді. 5 жағдайда ота жасауға республикалық орталықтарға жолданды.
  • Инфекционист: 25 пациент қаралды, оның 10-ында цитомегаловирус, 7-інде гепатит С анықталды. Үш бала жастағы пациентте цитомегаловирус инфекциясы алғаш рет анықталып, тиісті ұсыныстар берілді.
  • Аллерголог: 24 пациент қаралды. Екі пациентте алғаш рет бронхиалды демікпе диагнозы қойылып, ем тағайындалды. Үш пациенттің бұрынғы емдері түзетілді. Алты пациент аллерген-спецификалық иммунотерапияға (АСИТ) жіберілді. Төрт пациентте дерматиттің әртүрлі формаларына дифференциалды диагностика жүргізілді.
  • Нефролог: Стационарда 3 реанимациялық пациентке нефролог кеңесі берілді. Терапия бөлімінде 5 пациентке артериалды гипертензия және қант диабеті 2-типі, созылмалы бүйрек ауруы диагнозы қойылды. Жергілікті мамандармен гемодиализ бастау көрсеткіштері талқыланды. Амбулаторлық жағдайда 17 пациентке кеңес берілді, оның ішінде гемодиализдегі пациенттерге емдік түзетулер жасалды. Терминалды созылмалы бүйрек жеткіліксіздігі бар пациенттерге Қазақстанда және шетелде бүйрек трансплантациясы туралы кеңестер беріліп, ұсыныстар айтылды.
  • Психолог: 15 балаға психологиялық консультация берілді (7 инклюзивті, 3 мазасыздық, 1 социофобия, 3 қорқыныш, 1 отбасылық терапия). Барлығы 20 адамға психологиялық көмек көрсетілді, көбінесе мазасыздық, стресс, өмірге деген түңілушілік, отбасылық қиындықтар, қарым-қатынастағы коммуникацияның әлсіздігі анықталды. 6 адам терапиялық топқа қосылып, онлайн форматта ұзақ мерзімді көмек алу ұсынылды.
  • “Болашақ” бағдарламасымен білім алған кәсіпкерлер:жергілікті кәсіп бастаушыларға, оның ішінде 30 мектеп жасындағы балаларға кәсіпкерлік және мансаптық бағытта кеңестер берді.

Іс-шараның соңында Жаңаөзен қаласы әкімдігінің атынан қатысушы мамандарға алғыс айтылды. Сондай-ақ, тұрғындар тегін медициналық көмек көрсеткен барлық мамандарға, “Болашақ” Қауымдастығына, демеуші Мұрат Акиновке және ұйымдастырушыларға құрмет көрсетті. Мұндай жобалар ел өңірлерінің медицинасына, кәсібінің дамуына зор үлес қосады деп айтылды.

“Біліміміз — елімізге” жобасы ел аймақтары, соның ішінде Жаңаөзен қаласы үшін үлкен маңызға ие. Игі бастама халықтың денсаулығын жақсартуға, білім беруге және кәсіпкерлікті дамытуға бағытталған. Бұл іс-шара “Болашақ” бағдарламасының түлектерінің өз еліне деген сүйіспеншілігін және әлеуметтік жауапкершілігін көрсетеді.