«Силлено» ЖШС қатысушыларының жалпы жиналысының шешімі шықты. Мұхтар Авутбаев компанияның бас директоры ретінде қызметке кірісті. Бұл жайлы ЕLORDA MEDIA  «ҚазМұнайГаз» ҰК АҚ баспасөз орталығына сілтеп хабарлайды.

«ҚазМұнайГаз» ҰК АҚ Басқарма төрағасының орынбасары Дастан Абдулғафаров жаңа басшыны кәсіпорын ұжымына таныстырды.

Мұхтар Авутбаевтың еңбек жолы жайлы дерек

М.Авутбаев Л.Н.Гумилев атындағы Еуразия ұлттық университетінде, сондай-ақ И.М.Губкин атындағы Ресей мемлекеттік мұнай және газ университетінде «Мұнай-газ бизнесін басқару» мамандығы бойынша білім алған.

2020 жылдан бері «ҚазМұнайГаз» ҰК АҚ Инвестициялар және даму жобаларын басқару департаменті директоры болды, онда «Полиэтилен» жобасын қоса алғанда газ-химиясы саласына  жетекшілік етті.

Бұдан бұрын «ҚазМұнайГаз» Барлау Өндіру» АҚ-да бірқатар басшылық лауазымдарда, атап айтқанда барлау және өндіру активтерін басқару департаментінің директоры, корпоративтік қаржыландыру және инвесторлармен өзара іс-қимыл департаментінің директоры болды.

Сонымен қатар ҚМГ құрылымында бизнесті дамыту жөніндегі басқарушы директоры және жаңа жобаларды дамыту департаментінің директоры қызметтерін атқарды.

Айта кетсек, «Силлено» ЖШС-нің бұрынғы бас директоры Жандос Қайргелді «ҚазМұнайГаз» ҰК АҚ Инвестициялар және даму жобаларын басқару департаментінің директоры болып тағайындалды.