Болат Өтемұратов қорының қолдауымен ашылған Қосшы қаласында көп­функ­циялы комьюнити-ор­талық Ұлттық кітап күнінде ерекше жанданды. Орталық ашылғалы білім алу мен ілім жиюдың алтын арнасына айналған.

Орталықтың жалпы ауданы – 8,5 мың шаршы метр. Мұнда спортпен шұғылданып, білім алып және бос уақыт өткізуге арналған алаңдар бар.

БАҚ хабарлауынша,көп­функ­циялы комьюнити-ор­талықта қонақтарға арналған 233 орындық кинотеатр, 300 адамға арналған дәрісхана, көрме және конференция залдары, студия­лар, коворкинг және оқу залы бар кітапхана қызмет етеді. Балалар үшін роботтехника мен шахматтан бас­тап, хореография, қолданбалы өнерге дейінгі түрлі үйірме жұмыс істейді.

Қосшы қаласы Орталық­танды­рылған кітапхана жүйе­сінің басшысы Сымбат Бауыржанқызының айтуынша, жыл сайын кітап қорын толықтыру жұмыстарын жүр­­гізу нәтижесінде бүгінде кі­тап қоры 20 мыңға жеткен.

«Күнделікті оқырманның сұра­нысындағы кітаптар арнайы жур­налға тіркеліп отырады. Ол тізімді кітапханашылар жинақтап, әрі қарай кітап дүкендерімен, баспалармен байланыс орнатады. Қажетті тізімді бекітіп, оны сатып алған соң, жұмыстың ұқыптылық пен мұқияттылықты қажет ететін бөлігі бас­талады. Әрбір келген кітапты нө­мірлеп, кітапхана мөрі басылып, журналға тіркеледі. Кітапхана ісін автоматтандыру жүйесінде электронды каталогке енгізіледі. Мұның барлығы – әр кітапты өң­деуден өткізу кезеңі. Өңдеуден өткен кітаптар кітапхананың қызмет көрсету бөліміне тапсырылады», — дейді Сымбат Бауыржанқызы.

Кітапханада рухани-мәдени іс-шаралар жиі өтеді. Мәселен, Ғылым күнінде Санжар Керімбайдың «Қаныш және ғылыми майдан» кітабы желі­сінен ашық дәріс, Шоқан Уәлихановтың 190 жылдығына орай Жарылқап Бейсенбайұлы мен Серік Негимовтің қатысуымен «Шоқан Уәлиханов мұрасы» тақырыбында ғылыми конференция өткен. Сонымен қатар,  кітапхана қабырғасында «Жаназық» оқырман клубы құрылып, сенбі сайын түрлі шығарма талқылауды қолға алған.

Мұндай орталықтардың қоғамдық саналы ілгерлетіп, рухани өрістеудегі мән-маңызы жайлы Қор директоры Айнұр Кәрібозова да өзінің әлеуметтік желісіндегі парақшасында пікір білдірді:

Бүгінде Қазақстанда шетелде оқып келгеніңмен ешкімді таңқалдырмайсың. Бірақ сол шетелде жүргенде көбімізді таңқалдырған нәрсенің бірі комьюнити орталықтар еді. Әдетте қаланың әр ауданында метро станциясының жанында орналасатын, көп жағдайда ескі шіркеулердің ғимаратының іші кітапхана, білім мен өнер ошағына айналып, сол ауданның кәрісі де, жасы да, декреттегі аналар кішкентай балаларымен әр түрлі оқу курстарына келіп, өз уақытын тиімді пайдаланып жатқанып көріп, бізде де осындай орталықтар болса ғой деп армандайтынбыз. Міне, сондай орталықтар елімізде пайда бола бастады. Жуырда Болат Өтемұратов Қоры бас қаламыздың жанынан орын тепкен Қосшының тұрғындарына керемет заманауи комьюнити орталығын сыйлады. Жақында астаналық бір әріптесім Айғаным Астанада жаңа тренд пайда болуда — қала жастары Қосшы комьюнити орталығына барып, өз кездесулерін, жұмыстарын істеуді дәстүрге айналдыруда деп тағы бір таңқалдырды — деп жазды Айнұр Кәрібозова.

Фото: egemen.kz